Samantekt
Samantekt
6.1 Lausn vandamála til að finna frumkvöðlalausnir
Lausn vandamála felur í sér meira en ákvarðanatöku. Hún er nauðsynlegur þáttur í tilurð frumkvöðlaverkefna, nýtist við rekstur fyrirtækja og hjálpar fólki að takast á við hversdagslegar persónulegar aðstæður. Frumkvöðlar þurfa að þekkja eigin styrkleika og nýta viðeigandi aðferðir við lausn vandamála til að skapa nýstárlegar vörur. Til að koma sprotafyrirtæki fram úr samkeppninni þarf frumkvöðullinn að nýta öll tiltæk úrræði og alla færni í verkfærakistu sinni við lausn vandamála. Líkönin geta verið aðlögunarlíkön eða nýsköpunarlíkön og nýsköpunarlíkön eru algengari meðal frumkvöðla. Færni við lausn vandamála nær meðal annars til gagnrýninnar hugsunar, samskiptafærni, ákveðni, útsjónarsemi, þekkingar á viðskiptum og atvinnugreinum og hæfni til gagnagreiningar. Til eru ýmsar gerðir vandamálaleysa, þar á meðal sjálfstýrðir, kenningamiðaðir og samráðsmiðaðir vandamálaleysar.
6.2 Skapandi ferli við lausn vandamála
Skapandi ferli við lausn vandamála er rökrétt ferli. Skref þess eru að skýra, móta hugmyndir, þróa, innleiða og meta. Hvert skref hjálpar til við að skapa lausn. Skrefin eru endurtekin í hringrás þar til frumkvöðullinn hefur þróað nýstárlega lausn. Þegar frumkvöðlar glíma við sköpunarstíflu geta þeir notað verkfæri til að losa um hana, meðal annars fjöldavirkjun, hugstormun og söguborð. Öll þessi verkfæri styðja nýsköpunarmiðaða hugsun frumkvöðulsins.
6.3 Hönnunarhugsun
David Kelley, stofnandi hönnunarskóla Stanford-háskóla og meðstofnandi hönnunarfyrirtækisins IDEO, stuðlaði að útbreiðslu hönnunarhugsunar í viðskiptum og frumkvöðlastarfi. Hönnunarhugsun byggist á mannmiðaðri hönnun og má beita langt út fyrir vöru- og grafíska hönnun, meðal annars við hönnun samfélagsstefnu, viðskiptastefnu, þjónustu og stafrænna samskipta. Fimm svið líkans Stanford-háskóla um hönnunarhugsun eru samkennd, skilgreining, hugmyndavinna, frumgerðasmíð og prófun. Fjölmörg verkfæri frá ýmsum stofnunum og fyrirtækjum, allt frá IDEO til Google, hjálpa fólki að þróa þessi ferli og beita þeim.
6.4 Straumlínuferli
Straumlínuferli er kerfisbundið ferli sem stuðlar markvisst að stöðugum umbótum með því að lágmarka sóun og ónýtt aðföng í núverandi ferli. Nálgunin á rætur í framleiðslu en má bæði beita á innri ferla fyrirtækja og ytri vöruþróun. Í straumlínuferli eru athugun, mat, árangursmat og kortlagning á tússtöflu notuð til að leysa vandamál.