Inngangur
Efnisyfirlit kaflans
Inngangur
Á undanförnum árum hafa orðið miklir jarðskjálftar í nokkrum löndum víða um heim. Í janúar 2010 reið jarðskjálfti af stærðinni 7,3 yfir Haítí. Jarðskjálfti af stærðinni 9 skók norðausturhluta Japans í mars 2011. Í apríl 2014 varð jarðskjálfti af stærðinni 8,2 úti fyrir strönd norðurhluta Síle. Hvað merkja þessar tölur? Nánar tiltekið: hversu miklu öflugri er jarðskjálfti af stærðinni 9 en jarðskjálfti af stærðinni 8,2? Eða af stærðinni 7,3? Síðar í þessum kafla sýnum við hvernig lograföll eru notuð til að bera saman hlutfallslegan styrk tveggja jarðskjálfta út frá stærð hvors þeirra (sjá dæmi 1.39).
Stærðfræðigreining er sú grein stærðfræðinnar sem lýsir breytingum á föllum. Í þessum kafla rifjum við upp öll þau föll sem nemendur þurfa að kunna skil á við nám í stærðfræðigreiningu. Við skilgreinum margliðuföll, ræð föll, hornaföll, vísisföll og lograföll. Við rifjum upp hvernig reikna má gildi fallanna og sýnum eiginleika grafa þeirra. Við sýnum dæmi um jöfnur sem innihalda liði með þessum föllum og útskýrum þær algebruaðferðir sem þarf til að leysa jöfnurnar. Í stuttu máli leggur þessi kafli grunninn að því efni sem fram undan er. Nauðsynlegt er að þekkja þessar hugmyndir vel og hafa góð tök á þeim áður en formleg umfjöllun um stærðfræðigreiningu hefst í næsta kafla.