Samantekt

Samantekt

3.1 Siðferðileg og lagaleg álitaefni í frumkvöðlastarfi

Í fyrsta hluta kaflans er fjallað um tengsl frumkvöðlastarfs, siðferðis, samfélagsábyrgðar og laga. Stundum virðast siðferðileg og lögmæt breytni fléttast saman en við aðrar aðstæður er mikill munur þar á. Hlutinn sýnir hvernig siðferðileg sjónarmið geta veitt frumkvöðlum siðferðisáttavita þegar þeir leitast við að finna jafnvægi milli þess að afla tekna og gera það sem er rétt. Hafa þarf þó í huga að ólíkt lagaskyldum er það yfirleitt frjálst val eigenda og rekstraraðila fyrirtækja hvort þeir fylgja siðferðilegum viðskiptaháttum. Lögum verður hins vegar að fylgja, því annars kunna bæði frumkvöðullinn og fyrirtækið að bera skaðabóta- eða refsiábyrgð. Stundum eru mistök aðeins siðferðilegt frávik en í öðrum tilvikum fela þau einnig í sér lögbrot, eins og Equifax-málið sem fjallað var um.

3.2 Samfélagsábyrgð fyrirtækja og samfélagsleg frumkvöðlastarfsemi

Í þessum hluta voru skoðuð dæmi um frumkvöðlastarf þar sem samfélagsábyrgð gegnir lykilhlutverki í starfsemi skipulagsheildarinnar. Málefni á borð við sjálfbærni og umhverfisvitund skipta frumkvöðla og starfsfólk þeirra oft miklu máli. Flest sprotafyrirtæki vilja afla tekna og eins og hlutinn sýnir er vel hægt að gera það samhliða því að vinna að markmiði um samfélagsábyrgð. Sum fyrirtæki í samfélagslegri frumkvöðlastarfsemi ganga skrefi lengra og öðlast B Corp-vottun. B Corp-fyrirtæki eru annars eðlis en bandarísk C- og S-félög, sem eru skattalegir flokkar. B Corp-vottunin staðfestir að fyrirtæki hefur staðist úttekt óháðs aðila og sýnt fram á að það starfi í reynd með samfélagslega ábyrgum hætti.

3.3 Þróun vinnustaðamenningar sem einkennist af siðferðilegum metnaði og ábyrgð

Í þessum hluta kaflans er fjallað um vinnuumhverfi og mannauðsmál. Við skoðuðum hvernig frumkvöðlar geta gert fyrirtæki sitt að eftirsóknarverðum vinnustað þar sem siðferðileg breytni er mikils metin. Slík nálgun nær bæði til siðferðilegra og lagalegra sjónarmiða, svo sem að koma í veg fyrir mismunun, greiða sanngjörn laun, hvetja til og umbuna siðferðilegri hegðun og skapa andrúmsloft samvinnu og liðsheildar. Samfélagslega ábyrgur vinnustaður krefst langvarandi skuldbindingar vinnuveitanda við siðferðilega starfshætti og henni er ekki alltaf auðvelt að fylgja. Hún getur til dæmis krafist þess að yfirmaður eða eigandi viðurkenni eigin mistök, axli ábyrgð á þeim og leiðrétti þau. Þú vilt ekki vera þess konar yfirmaður sem getur aldrei sagt: „Þarna hafði ég rangt fyrir mér og næst geri ég betur.“