Samantekt

13.1 Efnajafnvægi

Afturkræft efnahvarf er í jafnvægi þegar framhvarf og bakhvarf eiga sér stað með sama hraða. Efnajafnvægi eru kvik ferli sem einkennast af stöðugu magni hvarfefna og myndefna.

13.2 Jafnvægisfastar

Samsetningu hvarfblöndu má lýsa með stærðfræðilegu falli sem kallast hvarfkvóti, Q. Fyrir efnahvarf í jafnvægi er samsetningin stöðug og Q kallast þá jafnvægisfasti, K.

Einsleitt jafnvægi er jafnvægi þar sem öll hvarfefni og myndefni eru í sama fasa. Misleitt jafnvægi er jafnvægi þar sem hvarfefni og myndefni eru í tveimur eða fleiri fösum.

13.3 Hliðrun jafnvægis: Lögmál Le Châteliers

Kerfi í jafnvægi geta raskast við breytingar á hitastigi, styrk og, í sumum tilfellum, rúmmáli og þrýstingi. Viðbrögðum kerfisins við slíkri röskun er lýst með lögmáli Le Châteliers: jafnvægiskerfi sem verður fyrir röskun hliðrast þannig að það vinnur gegn röskuninni og kemur aftur á jafnvægi.

13.4 Jafnvægisútreikningar

Útreikningur á jafnvægisföstum og/eða jafnvægisstyrk hefur hagnýtt gildi í mörgum tilfellum. Stærðfræðileg aðferð sem notar upphafsstyrk, breytingu á styrk og jafnvægisstyrk (og gengur undir skammstöfuninni ICE) kemur að góðum notum við ýmsar gerðir jafnvægisútreikninga.