33 Efnahagslegar undirstöður: peningar og vextir

Myndbandsverkefni

Ættu fjárfestar að búa sig undir verðbólgu eða óðaverðbólgu?

óðaverðbólga

Verðbólga felst í almennri hækkun verðlags. Þegar verðbólga verður mjög mikil er talað um óðaverðbólgu. Í myndbandinu Inflation or Hyperinflation - How to Prepare for the Coming Rise frá Financial Fast Lane er fjallað um hvernig unnt sé að verja fjárhag sinn þegar verðbólga er mikil.

Með hvaða hætti gætu viðbrögð bandaríska seðlabankans við efnahagsástandinu í kjölfar COVID-19-faraldursins valdið meiri verðbólgu en verið hefur í Bandaríkjunum undanfarna áratugi?

Hvaða ráð eru gefin í myndbandinu til fjárfesta sem vilja verja verðmæti sparnaðar síns gegn verðbólgu? Kannaðu hversu mikil verðbólga hefur verið frá vorinu 2021 og hvernig fjárfesti sem fylgdi ráðunum hefði vegnað.

Atvinnuleysi útskýrt

atvinnuleysi

Í myndbandinu Unemployment Explained frá Alþjóðagjaldeyrissjóðnum (IMF) er sjónarhorn hagfræðinga á atvinnuleysi skýrt. Þar er framboðs- og eftirspurnarlíkanið notað til að útskýra orsakir atvinnuleysis. Einnig er fjallað um hvernig hagfræðingar flokka atvinnuleysi og hvers vegna hvorki er líklegt né æskilegt að atvinnuleysishlutfallið verði núll.

Teldu upp þær tegundir atvinnuleysis sem kynntar eru í myndbandinu og nefndu dæmi um hverja tegund.

Veldu þrjú lönd og kannaðu atvinnuleysishlutfallið í hverju þeirra undanfarinn áratug. Greinir þú einhver mynstur í þróun atvinnuleysis innan landanna eða mun á milli þeirra? Segðu hvaða tegund atvinnuleysis þú telur hafa verið mest áberandi í hverju landi og rökstyddu svarið.