Tilviksspurningar

Christina hefur alltaf viljað opna lítið bakarí í hverfinu, Christina’s Confections. Hún vinnur nú heima og aflar tekna með því að baka kökur og annað bakkelsi fyrir brúðkaup, veislur og önnur sérstök tilefni. Hana langar að finna húsnæði fyrir bakaríið, enda telur hún eftirspurn vera fyrir hendi og vill færa út starfsemina í smásölurekstur. Hún á nokkurt sparifé og er með gott lánshæfismat en hefur áhyggjur af því að erfitt verði að fá lán. Sala hefur aukist jafnt og þétt og nú starfar hjá henni einn starfsmaður í hlutastarfi. Hún telur þó að með verslunarhúsnæði þurfi hún að ráða tvo starfsmenn til viðbótar í hlutastarf. Ráði hún starfsfólk þarf hún að meta launakostnað, hve margar vinnustundir hvers starfsmanns hún þurfi og hvaða verkefnum þeir eigi að sinna á þessu stigi rekstrarins. Auk annars kostnaðar þarf hún því að gera ráð fyrir launum, aðföngum, tryggingum, húsaleigu, auglýsingum, sölukerfi og ýmsum liðum sem ekki fylgdu heimarekstrinum. Hún þarf að finna út hvernig nýja verslunin muni afla tekna og hvernig hún geti fjármagnað eða greitt stofnkostnað hennar.

Christina þarf að meta allar auðlindir sem fyrirtækið krefst og gera gátlista svo hún geti ákveðið hvort rétti tíminn sé kominn til að taka þetta mikilvæga skref í rekstri bakarísins. Eftir því sem ferlinu vindur fram verða spurningarnar sértækari og svörin mun ítarlegri.

Farðu yfir auðlindaþarfir Christinu og gerðu lista yfir þær.

Snúðu aftur að tilvikinu um Christina’s Confections og farðu yfir auðlindalistann sem þú gerðir. Nú liggja fyrir frekari upplýsingar. Mettu hvort listinn sé fullnægjandi; ef ekki skaltu bæta við eða fjarlægja liði eftir því sem reksturinn krefst. Hvaða viðbótarauðlindir komst þú auga á? Hvað getur Christina gert til að tryggja að hún geti staðið undir öllum útgjöldum?

Hafðu dæmið um bakaríið Christina’s Confections í huga og beindu sjónum að þroskafasa fyrirtækisins. Lýstu hvernig Christina getur byggt upp vörumerki sitt til að aðgreina bakaríið frá öðrum bakaríum og hvers konar kostnaðar hún megi vænta við þá vinnu.