Verkefni

Verkefni

Samlagningarkerfi

Leitaðu á netinu að „samlagningarkerfum talna“ og „additive number systems“. Hvaða kerfi koma fram?

• Lýstu samlagningarkerfinu sem þú fannst.

Leitaðu á netinu að þremur öðrum samlagningarkerfum talna.

• Berðu kerfin sem þú fannst saman. Athugaðu til dæmis hve oft má endurtaka tiltekið tákn áður en annað tákn er notað.
• Finndu þrjár aðstæður þar sem samlagningarkerfi eru enn notuð.

Tölvur og talnakerfi

Leitaðu á netinu að upplýsingum um hvaða grunntölu tölvur nota.

Hafa verið gerðar tilraunir til að nota aðrar grunntölur í tölvum?

Kannaðu hvers vegna talnakerfið sem tölvur nota hentar þeim vel.

Kannaðu hvernig talnakerfi tölva tengist rafrásum þeirra.

Kannaðu tengsl Boole-rökfræði og tvíundarkerfis tölva og athugaðu hvað felst í tvískiptingunni í hvoru tilviki.

Rannsóknir fara fram á notkun skammtabita í tölvum. Kannaðu hvað skammtabitar eru og við hvaða útreikninga notkun þeirra gæti veitt forskot á hefðbundnar tölvur.

Menningarheimar sem nota aðrar grunntölur en 10

Leitaðu á netinu að þremur menningarheimum, öðrum en menningarheimum Babýloníumanna og maja, sem hafa notað talnakerfi með aðra grunntölu en 10.

• Segðu hvaða grunntala er notuð í hverju kerfi.
• Reyndu að finna hvers vegna viðkomandi menningarheimur notaði þessa grunntölu.
• Veldu eitt kerfanna og útskýrðu það. Taktu fram hvort það sé samlagningarkerfi, sætiskerfi eða blanda af þessu tvennu og hvort það hafi núlltákn.

Saga núllsins

Notaðu tiltækar heimildir til að kanna sögu núllsins í að minnsta kosti þremur ólíkum talnakerfum. Fjallaðu meðal annars um hvenær og hvers vegna núlltákn þróaðist í hverju kerfi og hvers vegna það er mikilvægt í sætiskerfi.

Talnakerfi frá öðrum heimshlutum

Notaðu tiltækar heimildir til að finna að minnsta kosti þrjú talnakerfi frá Afríku sunnan Sahara, Ástralíu, Kína eða Kyrrahafseyjum. Kannaðu hvort þau séu sætiskerfi, samlagningarkerfi eða blanda af hvoru tveggja, hvaða hugtök og heiti eru notuð um þau, hvort þau hafi núlltákn og, ef um sætiskerfi er að ræða, hvaða grunntölu þau nota.