Inngangur

Portúgalar reistu kastala heilags Georgs í Mina (síðar nefndur Elmina) á fimmtándu öld, en margir sagnfræðingar líta á byggingu hans sem upphaf árnýaldar (mynd 3.1). Virkið stóð á strönd Gana nútímans og tryggði Portúgölum fótfestu í gullverslun Vestur-Afríku, sem var þá að mestu í höndum Songhaíríkisins (Songhay). Efnahagsleg velferð og langlífi Songhaíríkisins byggðust á öruggri og greiðri verslun með varning yfir Sahara og um Norður-Afríku. Gull var þá tvímælalaust verðmætasta verslunarvara Vestur-Afríku og með tímanum varð verslun með þrælað fólk jafn mikilvæg. Með hagnað sinn að leiðarljósi tengdu portúgalskir kaupmenn í Elmina saman viðskiptastrauma þessara tveggja eftirsóttu vara. Þeir urðu milliliðir sem útveguðu þrælað fólk frá Benín til vinnu í námum akanfólksins í Gana og Fílabeinsströndinni nútímans. Á sextándu öld var Elmina orðin einn fyrsti beini tengiliðurinn milli evrópskra þrælasala og þrælamarkaða í innri hluta Afríku.