Samantekt

Samantekt

5.1 Frumkvöðlatækifæri

Frumkvöðlatækifæri er fyrir hendi þegar raunhæft er að mæta eftirspurn neytenda með því að koma vöru eða þjónustu á markað. Joseph Schumpeter, einn af fyrstu fræðimönnum frumkvöðlastarfs, skilgreindi skapandi eyðileggingu — þegar nýsköpun veldur umbyltingu og skapar möguleg frumkvöðlatækifæri. Hagfræðileg áhersla Schumpeters varð til þess að hann flokkaði möguleg tækifæri eftir framboðsmagni, eftirspurn eða breytingum á notkun tækni.

Nýir frumkvöðlar ættu að fylgjast náið með atvinnugreinum sem vekja áhuga og viðhalda þannig yfirsýn yfir tækifæri sem vert er að rannsaka. Einnig þarf að gefa gaum að drifkröftum tækifæra, svo sem nýjum fjármögnunarleiðum, tækniframförum og efnahagslegum þáttum.

5.2 Rannsókn mögulegra viðskiptatækifæra

Rannsókn á raunhæfi frumkvöðlahugmyndar hjálpar þér að ákvarða hvort vert sé að fylgja verkefninu eftir eins og staðan er nú. Notaðu frumrannsókn og rannsókn á fyrirliggjandi gögnum til að kanna hvort eftirspurn, markaðsgerð og markaðsstærð séu nægilegar og hvort til staðar séu nægilegt hagnaðarhlutfall og þau aðföng sem þarf til að stofna fyrirtækið og halda því gangandi. Frumkvöðlar sem kanna valkosti þurfa einnig að þekkja tækifæri sem spretta úr atvinnugreininni og frá neytendum.

5.3 Samkeppnisgreining

Samkeppnisgreining hjálpar til við að meta raunhæfi hugmyndarinnar með því að skoða hana í tilteknu samkeppnisumhverfi. Verkfæri á borð við samkeppnisgreiningartöflu, SVÓT-greiningu, PEST-greiningu og aðferð hringjanna þriggja hjálpa þér að rannsaka viðfangsefnin nánar og skerpa á áætlunum þínum.