Tilviksspurningar

Mandy Tillman var framhaldsskólanemi sem bjó í dreifbýli í Oklahoma. Hún var aðeins fjórtán ára en vildi afla aukafjár fyrir ferð fjölskyldunnar til Miklagljúfurs sumarið eftir. Þegar Mandy fór að versla með foreldrum sínum tók hún eftir að aðeins einn staður í bænum seldi ræktunarbakka með blómum og grænmeti til gróðursetningar að vori og úrvalið var lítið. Hún skráði hjá sér hvaða plöntur og blóm verslunin seldi og hvað þau kostuðu.

Þegar Mandy kom heim úr verslunarferðinni leitaði hún á netinu að verði á fræjum og búnaði. Foreldrum hennar leist vel á að hún aflaði eigin vasapeninga fyrir fríið og létu henni eftir stórt svæði í kjallaranum þar sem hún gat byrjað ræktunina.

1. Hvað fleira þarf Mandy að vita um reksturinn áður en hún hefst handa?
2. Hvað annað telur þú að Mandy þurfi til að koma fyrirtækinu á fót?
3. Sérðu einhver hugsanleg vandamál við þessa viðskiptahugmynd?
4. Með hvaða hætti gæti Mandy selt plönturnar?
5. Er þetta viðskiptahugmynd eða frumkvöðlatækifæri?

Rannsakaðu gleraugnafyrirtækið Warby Parker.

1. Hvert er viðskiptalíkan Warby Parker?
2. Hvert er virðistilboð Warby Parker?
3. Lýstu markhópi Warby Parker. Hvaða heimildir notaðir þú til að greina markhópinn?
4. Ef Warby Parker væri ekki til og þú hygðist stofna gleraugnafyrirtæki sem seldi beint til neytenda, hvaða fimm þætti myndir þú helst rannsaka til að ákvarða hvort hugmyndin væri raunverulegt frumkvöðlatækifæri?

Travis og Katelyn höfðu mikinn áhuga á bakpokaferðum og höfðu gengið Appalachian-gönguleiðina tvisvar. Þótt þau hefðu stundað bakpokaferðir árum saman lærðu þau eitthvað nýtt í hvert sinn sem þau lögðu af stað. Nær allt göngufólk sem þau hittu var fljótt að gefa góð ráð um hentugasta fatnaðinn eða búnaðinn á gönguleiðinni. Travis og Katelyn ákváðu að stofna blogg fyrir bakpokaferðafólk og selja framleiðendum og smásölum útivistarbúnaðar auglýsingapláss.

1. Ef þú værir að stofna fyrirtæki sem hjálpaði bakpokaferðafólki að ferðast um óbyggðir, hvaða vörur myndir þú bjóða og hvert væri einstakt söluboð hverrar þeirra?
2. Hvaða ávinning myndir þú bæta við vefinn til að laða bakpokaferðafólk að honum? Íhugaðu hvernig þú myndir aðgreina vefinn frá vefjum keppinauta.
3. Nýttu þekkingu þína á bakpokaferðum og áhuga á að stofna fyrirtæki á því sviði til að vinna PEST-greiningu. Tilgreindu eina staðreynd í hverjum flokki PEST-greiningarinnar sem gæti hjálpað til við að finna nýjar upplýsingar eða mynstur til stuðnings fyrirtækinu.
4. Hvernig myndir þú breyta viðskiptalíkaninu út frá svörum þínum við fyrri spurningunni?