Samantekt hluta

Samantekt hluta

1.1 Að móta hnattrænt sjónarhorn

Þekking á fortíðinni, sögu mannkyns, hefur lengi verið talin merki um siðmenningu og aldrei hefur verið mikilvægara að rannsaka hana. Nám í mannkynssögu veitir þá færni sem þarf til að mæta þörfum hnattræns vinnumarkaðar og eflir um leið skilning þinn á sjálfum þér og stöðu þinni í hnattrænu samfélagi okkar. Þú öðlast færni í gagnrýninni hugsun og greiningu sem auðveldar þér að gegna hlutverki heimsborgara í samtengdum heimi okkar. Þetta rit hjálpar þér að nálgast söguna með opnum huga og fjallar um hana þannig að hún öðlist merkingu fyrir þig, oft með því að draga fram efni sem enn á erindi við samfélag samtímans.

1.2 Frumheimildir

Frumheimildir eru vitnisburður frá fyrstu hendi sem sagnfræðingar leggja til grundvallar þekkingu sinni á fortíðinni. Við túlkun þeirra þarf að huga að fjórum lykilþáttum: höfundi, viðtakendum, tilgangi og samhengi. Afleiddar heimildir eru verðmætir upphafspunktar rannsókna og veita samhengi, en nemendur þurfa að vera meðvitaðir um hvers kyns hlutdrægni sem í þeim kann að felast. Þrátt fyrir vinnu margra kynslóða sagnfræðinga vitum við enn lítið um sumt fólk og sum svæði. Við verðum að vona að nýjar kynslóðir sagnfræðinga haldi áfram að skerpa túlkun okkar á fortíðinni.

1.3 Orsakasamhengi og túlkun í sagnfræði

Helsta hlutverk sagnfræðingsins er að komast að því hvers vegna sagan tók þá stefnu sem raun ber vitni. Hvað olli þeim atburðum sem hafa mótað sameiginlega fortíð mannkyns? Til að svara þessari spurningu beita sagnfræðingar vandaðri aðferðafræði við túlkun sem grundvallast á leit að orsakasamhengi. Þeir rannsaka atburði með hliðsjón af bæði beinum orsökum og samverkandi þáttum en forðast um leið að fella dóma og eru reiðubúnir að endurskoða túlkanir sínar. Nú hefur þú þau verkfæri sem þú þarft til að takast til fulls á við efni þessa rits og hefja ferðalag þitt um fortíð mannkyns.