Samantekt kafla
Samantekt kafla
16.1Menntun um heim allan
Menntakerfi heimsins eru ólík á margan hátt, en þau mótast öll af sömu grundvallarþáttum, þar á meðal aðgengi að úrræðum og fjármagni. Skipting menntunarúrræða er mikilvægt úrlausnarefni í mörgum ríkjum. Í Bandaríkjunum er til dæmis mikill munur á útgjöldum fylkja á hvern nemanda. Menntun fer bæði fram með formlegu og óformlegu námi og hvort tveggja stuðlar að menningarmiðlun. Jafnt aðgengi að menntun er viðfangsefni um allan heim.
16.2Fræðileg sjónarhorn á menntun
Helstu kenningar félagsfræðinnar varpa hver með sínum hætti ljósi á menntun. Virknihyggjan lítur á menntun sem mikilvæga samfélagsstofnun sem gegnir bæði yfirlýstri og dulinni virkni. Frá því sjónarhorni þjónar menntun þörfum samfélagsins með því að búa nemendur undir þau hlutverk sem þeir taka síðar að sér. Samkvæmt átakakenningum stuðla skólar aftur á móti að viðgangi ójöfnuðar eftir stétt, kynþætti, þjóðerni og kyni. Femínískar kenningar beina sérstaklega sjónum að rótum kynjamisréttis í menntun og þeim ferlum sem viðhalda því. Táknræn samskiptahyggja skoðar hvernig menntakerfið stimplar einstaklinga.
16.3Álitamál í menntun
Fjölþætt hlutverk skóla í lífi nemenda hefur í för með sér ýmsar áskoranir. Afnám kynþáttaaðskilnaðar í skólum er dæmi um sögulegt álitamál; úrskurðurinn Brown gegn skólaráði Topeka frá 1954 markaði þar tímamót. Í fjölbreyttu menntakerfi samtímans eru félags- og efnahagsleg staða nemenda og fjölbreytileiki nemendahópsins áfram meðal helstu úrlausnarefna. Fatlaðir nemendur ná nú betri árangri en á fyrri áratugum, en enn er vandkvæðum bundið að greina ólíkar þarfir þeirra og veita viðeigandi þjónustu. Skólaval og samræmd próf eru meðal annarra menntamála sem hafa áhrif á samfélagið.