E | Áhrif markaðsaðgerða á efnahagsreikninga þegar bindifé banka er takmarkað

E | Áhrif markaðsaðgerða seðlabanka á efnahagsreikninga í kerfi takmarkaðs bindifjár

Í umfjölluninni um markaðsaðgerðir kom fram að alríkismarkaðsnefnd Bandaríkjanna (FOMC) mótar stefnuna en seðlabankakerfið framkvæmir kaup og sölu verðbréfa. Í kerfi takmarkaðs bindifjár breyta slík viðskipti samsetningu eigna banka og heildarmagni bindifjár í bankakerfinu. Áhrifin á útlán, innlán og peningamagn ráðast síðan meðal annars af útlánaeftirspurn, áhættumati, eiginfjár- og lausafjárkröfum og greiðsluflæði milli banka. Myndirnar sýna einfaldað dæmi um ferlið.

Breytingar á efnahagsreikningi Gleðibankans

Þrír efnahagsreikningar Gleðibankans. Í (a) eru eignir 460: bindifé 40, skuldabréf 120 og útlán 300; innlán eru 400 og eigið fé 60. Í (b) kaupir seðlabankinn skuldabréf fyrir 20: bindifé verður 60 og skuldabréf 100. Í (c) eru 20 greidd út sem viðbótarútlán: bindifé verður aftur 40 og útlán 320. Hver reikningur er í jafnvægi. — **Mynd E1.** | Markaðskaup seðlabankans og efnahagsreikningur Gleðibankans

Mynd E1(a) sýnir Gleðibankann með eignir að verðmæti 460 milljónir dala. Þar af eru 40 í bindifé, 120 í skuldabréfum og 300 í útlánum. Á móti standa 400 milljónir í innlánum og 60 í eigin fé. Í (b) kaupir seðlabankinn skuldabréf fyrir 20 milljónir. Skuldabréfaeign bankans minnkar um 20 og bindifé hans eykst jafnmikið. Heildareignir og eigið fé breytast því ekki. Í (c) er gert ráð fyrir að bankinn vilji aftur halda 40 milljónum í bindifé, finni lánshæfan lántaka og greiði út 20 milljóna lán. Þá aukast útlán um 20 en bindifé bankans minnkar um 20. Útlánið eyðir þó ekki bindifé úr bankakerfinu í heild. Greiðslan flytur bindifé til annars banka. Markaðskaup seðlabankans eru aðgerðin sem jók heildarmagn bindifjár um 20.

Þrír efnahagsreikningar Gleðibankans. Í (a) eru eignir 460: bindifé 40, skuldabréf 120 og útlán 300; innlán eru 400 og eigið fé 60. Í (b) selur seðlabankinn bankanum skuldabréf fyrir 30: bindifé verður 10 og skuldabréf 150. Í (c) dragast útlán saman um 30 og bindifé verður aftur 40. Hver reikningur er í jafnvægi. — **Mynd E2.** | Markaðssala seðlabankans og efnahagsreikningur Gleðibankans

Mynd E2(a) sýnir sömu upphafsstöðu. Í (b) kaupir Gleðibankinn skuldabréf fyrir 30 milljónir dala af seðlabankanum. Bindifé bankans minnkar um 30 og skuldabréfaeignin eykst jafnmikið, en heildareignir og eigið fé standa óbreytt. Í (c) er gert ráð fyrir að bankinn vilji halda 40 milljónum í bindifé og dragi útlán sín saman um 30; endurgreiðslur eða sala útlána færa honum þá bindifé frá öðrum bönkum. Sú tilfærsla eykur ekki bindifé bankakerfisins í heild. Sala seðlabankans í (b) er aðgerðin sem dró heildarmagnið saman um 30. Dæmið sýnir mögulega aðlögun efnahagsreiknings, ekki sjálfvirka reglu um útlán hvers banka.