Inngangur
Yfirlit kafla
Inngangur
Flest dýr eru flóknar fjölfruma lífverur sem þurfa kerfi til að flytja næringarefni um líkamann og fjarlægja úrgangsefni. Blóðrásarkerfið hefur þróast frá einföldu flæði milli frumna í fyrstu þróun dýra yfir í flókið æðanet sem nær til allra hluta mannslíkamans. Þetta víðfeðma net sér frumum, vefjum og líffærum fyrir súrefni og næringarefnum og fjarlægir koltvíoxíð og annan úrgang, sem myndast meðal annars við frumuöndun.
Í miðju blóðrásarkerfis mannsins er hjartað. Mannshjartað er á stærð við krepptan hnefa og er varið undir rifjaboganum. Það er gert úr sérhæfðum hjartavöðva og dælir blóði um allan líkamann og til hjartans sjálfs. Samdrættir hjartans ráðast af innri rafboðum sem heilinn og hormón innkirtlakerfisins hjálpa til við að stjórna. Skilningur á grunnbyggingu og starfsemi hjartans er mikilvægur til að skilja blóðrásar- og öndunarkerfi líkamans.
Loftskipti eru eitt af grundvallarhlutverkum blóðrásarkerfisins. Lífverur án sérhæfðra öndunarlíffæra þurfa ekki blóðrásarkerfi til loftskipta, því súrefni og koltvíoxíð flæða beint milli líkamsvefja þeirra og ytra umhverfis. Hjá lífverum með lungu eða tálkn þarf hins vegar að flytja súrefni frá þessum sérhæfðu öndunarlíffærum til líkamsvefja með blóðrásarkerfi. Þess vegna hafa blóðrásarkerfi þróast þannig að þau mæta miklum fjölbreytileika í líkamsstærð og líkamsgerð dýra.