Section Summary

Samantekt kafla

8.1 Tækni í dag

Tækni er hagnýting vísinda til að leysa vandamál daglegs lífs. Tækninni fleygir stöðugt fram, en aðgangur að henni er ójafn. Þessi mismunur nefnist stafræn gjá. Þekkingarbilið er ein afleiðing hennar: Skortur á þekkingu eða upplýsingum kemur í veg fyrir að þeir sem hafa ekki haft aðgang að tækni öðlist færni sem nýtist á vinnumarkaði.

8.2 Fjölmiðlar og tækni í samfélaginu

Fjölmiðlar og tækni hafa verið samofin í samskiptum manna frá öndverðu. Prentvélin, ritsíminn og internetið sýna þetta samspil vel. Fjöldamiðlar hafa gert fleirum kleift að eiga sameiginlega félagslega reynslu, en nýmiðlar skapa nú nær ótakmarkað rými fyrir alla sem vilja láta í sér heyra. Auglýsingar hafa einnig breyst með tækninni. Nýmiðlar gera neytendum kleift að sneiða hjá hefðbundnum auglýsingaleiðum og knýja fyrirtæki til að beita sífellt nýstárlegri og ágengari aðferðum til að ná athygli okkar.

8.3 Hnattræn áhrif fjölmiðla og tækni

Tækni knýr hnattvæðingu, en afleiðingarnar eru ekki alltaf auðskildar. Sumir hagfræðingar telja að tækniframfarir jafni samkeppnisstöðu þannig að hver sem er geti keppt á heimsmarkaði hvaðan sem er. Í reynd safnast tækifæri þó enn á landfræðilega hagstæð svæði. Útbreiðsla tækni hefur engu að síður aukið flæði hennar yfir landamæri til jaðar- og hálfjaðarríkja. Langt er þó í raunverulegt hnattrænt jafnrétti í tækniaðgangi.

8.4 Fræðileg sjónarhorn á fjölmiðla og tækni

Fjölmargar kenningar fjalla um þróun samfélags, tækni og fjölmiðla. Virknihyggjan beinir sjónum að framlagi tækni og fjölmiðla til stöðugleika samfélagsins, allt frá því að auðvelda fólki að njóta frístunda til þess að auka framleiðni. Átakakenningarsinnar beina fremur athygli að því hvernig tækni styrkir ójöfnuð milli samfélaga, bæði innan ríkja og milli þeirra. Þeir skoða einnig hvernig fjölmiðlar veita helst valdamestu hópunum vettvang og hvernig nýmiðlar geta hjálpað réttindaskertum hópum að láta í sér heyra. Táknrænir samskiptahyggjusinnar kanna hvernig tæknin er notuð sem tákn um allt frá kaldri og dauðhreinsaðri framtíð til farsæls starfsferils.